អាកាសចរណ៍ជាតិកម្ពុជា សម្ពោធស្លាកសញ្ញា និងរចនាលើតួយន្ដហោះថ្មី, រដ្ឋមន្ត្រី ម៉ៅ ហាវណ្ណាល់ ថា ស្លាកសញ្ញាថ្មីនេះ ឆ្លុះបញ្ចាំងនូវភាពរីកចម្រើន នៃវិស័យអាកាសចរណ៍ស៊ីវិលនៅកម្ពុជា

(ភ្នំពេញ)៖ លោកបណ្ឌិត ម៉ៅ ហាវណ្ណាល់ ប្រធានក្រុមប្រឹក្សាភិបាល នៃក្រុមហ៊ុនអាកាសចរណ៍ជាតិកម្ពុជា និងជារដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល នៅថ្ងៃទី១៥ ខែមករា ឆ្នាំ២០២៦នេះ បានអញ្ជើញជាអធិបតីភាព ក្នុងពិធីសម្ពោធស្លាកសញ្ញា និងរចនាលើតួយន្ដហោះថ្មី (New Logo and Aircraft Livery) របស់ក្រុមហ៊ុនអាកាសចរណ៍ជាតិកម្ពុជា (Air Cambodia) នៅអាកាសយានដ្ឋានអន្តរជាតិតេជោ (KTI)។

លោកបណ្ឌិត ម៉ៅ ហាវណ្ណាល់ បានថ្លែងថា «ស្លាកសញ្ញាថ្មី របស់ក្រុមហ៊ុនអាកាសចរណ៍ជាតិ ដែលបានទទួលការសម្រេច ពីរាជរដ្ឋាភិបាលកម្ពុជា កាលពីថ្ងៃទី៧ ខែវិច្ឆិកា ឆ្នាំ២០២៥ បានបញ្ជាក់នូវតួនាទី កាន់តែសំខាន់ថែមទៀត របស់ក្រុមហ៊ុនអាកាសចរណ៍ជាតិ លើការបង្ហាញអត្តសញ្ញាណជាតិខ្មែរ ទៅកាន់ពិភពលោកទាំងមូល ព្រមបានទាំងឆ្លុះបញ្ចាំង នូវភាពរីកចម្រើន នៃវិស័យអាកាសចរណ៍ស៊ីវិល ទេសចរណ៍ ពាណិជ្ជកម្ម និងការដោះដូរវប្បធម៌ និងប្រជាជន នៅកម្ពុជា តាមរយៈការដឹកជញ្ជូនតាមផ្លូវអាកាស»។