កម្ពុជា ស្វាគមន៍ការបង្កើតការិយាល័យទីភ្នាក់ងារសហប្រតិបត្តិការអភិវឌ្ឍន៍លុចសំបួ នៅរាជធានីភ្នំពេញ
ឯកឧត្តម មាស គឹមហេង រដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ បានទទួលការចូលជួបសម្តែងការគួរសមរបស់លោក Thomas LAMMAR ភារៈធារីស្តីទីនៃស្ថានទូតលុចសំបួប្រចាំសាធារណរដ្ឋប្រជាធិបតេយ្យប្រជាមានិតឡាវ។
ជំនួបនេះ បានធ្វើឡើងនៅទីស្តីការក្រសួង នាថ្ងៃទី២៨ ខែឧសភា ឆ្នាំ២០២៦ថ្មីៗនេះ។
ឯកឧត្តមរដ្ឋលេខាធិការ បានគូសបញ្ជាក់អំពីចំណងមិត្តភាពដ៏កក់ក្តៅរវាងកម្ពុជា និងលុចសំបួ និងបានថ្លែងអំណរគុណចំពោះរាជរដ្ឋាភិបាលនៃប្រទេសលុចសំបួក្នុងការគាំទ្រការអភិវឌ្ឍសេដ្ឋកិច្ច និងសង្គមរបស់កម្ពុជា តាមរយៈការចុះហត្ថលេខាលើកិច្ចព្រមព្រៀងសហប្រតិបត្តិការទូទៅរវាងប្រទេសទាំងពីរ កាលពីឆ្នាំមុន។ ឯកឧត្តមក៏បានស្វាគមន៍ចំពោះការបង្កើតការិយាល័យទីភ្នាក់ងារសហប្រតិបត្តិការអភិវឌ្ឍន៍លុចសំបួ “Lux-Development S.A.” នៅរាជធានីភ្នំពេញ នាពេលខាងមុខ ដែលជាជំហានដ៏សំខាន់មួយក្នុងការពង្រឹងបន្ថែមទៀតនូវទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ។
ជាការឆ្លើយតប លោក Thomas LAMMAR បានបញ្ជាក់ឡើងវិញនូវការគាំទ្ររបស់លុចសំបួចំពោះអាទិភាព អភិវឌ្ឍជាតិរបស់កម្ពុជាស្របនឹងយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា ជាពិសេសក្នុងវិស័យការអភិវឌ្ឍធនធានមនុស្ស សុខាភិបាល ការអភិវឌ្ឍជនបទ ការកាត់បន្ថយភាពក្រីក្រ ការការពារបរិស្ថាន ព្រមទាំងកិច្ចសហប្រតិបត្តិការក្នុងការដោះមីនមនុស្សធម៌។ លោកភារៈធារីស្តីទីក៏បានណែនាំបេក្ខភាព នាយិកាគ្រប់គ្រងការិយាល័យទីភ្នាក់ងារសហប្រតិបត្តិការអភិវឌ្ឍន៍របស់លុចសំបួប្រចាំកម្ពុជាផងដែរ។
ក្នុងអំឡុងពេលនៃជំនួបនេះ ឯកឧត្តមរដ្ឋលេខាធិការ ក៏បានជម្រាបជូនគណៈប្រតិភូអំពីបច្ចុប្បន្នភាពស្តីពីស្ថានការណ៍ព្រំដែនកម្ពុជា-ថៃ និងបានគូសបញ្ជាក់អំពីការប្តេជ្ញាចិត្តរបស់កម្ពុជាក្នុងការដោះស្រាយជម្លោះដោយសន្តិវិធី ស្របតាមច្បាប់អន្តរជាតិ និងកិច្ចព្រមព្រៀងដែលមានស្រាប់៕
