យុវជនម្នាក់បានស្លាប់ភ្លាមៗនៅនឹងកន្លែងកើតហេតុ ខណៈជនរងគ្រោះកំពុងជិះម៉ូតូត្រឡប់ទៅផ្ទះវិញត្រូវរថយន្តមិនស្គាល់ម៉ាកមួយគ្រឿងបើកទិសដៅបញ្រ្ចាស់គ្នាបុកចំពីមុខយ៉ាងពេញទំហឹងអូសជាច្រើនម៉ែត្រ

ភ្នំពេញ ៖ យុវជនម្នាក់បានស្លាប់ភ្លាមៗនៅនឹងកន្លែងកើតហេតុ ខណៈជនរងគ្រោះកំពុងជិះម៉ូតូត្រឡប់ទៅផ្ទះវិញត្រូវរថយន្តមិនស្គាល់ម៉ាកមួយគ្រឿងបើកទិសដៅបញ្រ្ចាស់គ្នាបុកចំពីមុខយ៉ាងពេញទំហឹងអូសជាច្រើនម៉ែត្រ ហើយរថយន្តបង្ក បានបន្តល្បឿនបើកគេចខ្លួនបាត់ស្រមោល។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៨:៣០នាទីយប់ថ្ងៃទី០៤ ខែកក្កដាឆ្នាំ២០២៦ស្ថិតនៅលើផ្លូវបេតុង ក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញយុវជនរងគ្រោះម្នាក់ជិះម៉ូតូ១គ្រឿងម៉ាកហុងដាឌ្រីមសង់ពណ៌ខ្មៅ ពាក់ផ្លាកលេខ ភ្នំពេញ 1LL-3885 ជិះម្នាក់ឯងធ្វើដំណើរតាមបណ្ដោយផ្លូវបេតុងទិសដៅពីកើតទៅលិចក្នុងល្បឿនលឿនមធ្យម លុះពេលជិះមកដល់ត្រង់ចំណុចកើតហេតុខាងលើស្រាប់តែមានរថយន្តបង្កមួយគ្រឿងមិនស្គាល់ម៉ាកបើកមកទិសដៅបញ្រ្ចាស់គ្នាពីលិចទៅកើតក្នុងល្បឿនលឿន ហេីយក៏រ៉េចង្កូតទៅបុកចំពីមុខម៉ូតូប៉ើងអូសទៅមុខច្រើនម៉ែត្របណ្តាលឲ្យម្ចាស់ម៉ូតូស្លាប់ភ្លាមៗ ចំណែករថយន្តបង្កបានបើកគេចខ្លួនបាត់ស្រមោល។
ក្រោយកើតហេតុ សមត្ថកិច្ចមូលដ្ឋានសហការជាមួយមន្ត្រីជំនាញចរាចរណ៍ចុះមកវាស់វែងយកម៉ូតូជនរងគ្រោះទៅរក្សាទុកនៅអធិការដ្ឋាននគរបាលខណ្ឌសែនសុខជាបណ្ដោះអាសន្ន និងធ្វើកំណត់ហេតុប្រគល់សពឱ្យទៅក្រុមគ្រួសារយកទៅធ្វើបុណ្យតាមប្រពៃណី រីឯរថយន្តបង្កសមត្ថកិច្ចនិងធ្វើការតាមស្រាវជ្រាវដើម្បីឃាត់យកមកចាត់ការតាមនីតិវិធីច្បាប់៕