ACU សម្រេចធ្វើកំណត់ហេតុពិសេស លើគណៈកម្មការប្រឡង ០៣រូប ដែលបានពាក់នាឡិកាឆ្លាតវៃ (Smart Watch) ក្នុងពេលកំពុងដំណើរការប្រឡងបាក់ឌុប
(សៀមរាប)៖ ដំណើរការប្រឡងមួយព្រឹកថ្ងៃទី១០ ខែសីហា ឆ្នាំ២០២៦នេះ គណៈមេប្រយោគទូទាំងប្រទេសប្រចាំខេត្តសៀមរាប និងក្រុមការងារសង្កេតការណ៍ របស់អង្គភាពប្រឆាំងអំពើពុករលួយ (ACU) បានសម្រេចធ្វើកំណត់ហេតុពិសេស ករណីគណៈកម្មការប្រឡងចំនួន ០៣រូប ពាក់នាឡិកាឆ្លាតវៃ (Smart Watch) ក្នុងពេលកំពុងដំណើរការប្រឡង ក្នុងនោះសមាជិកគណៈកម្មការកណ្ដាល ២រូប នៅមណ្ឌលវិទ្យាល័យ ហ៊ុន សែន សៀមរាប និងសមាជិកគណៈកម្មការត្រួតពិនិត្យអគារ ១រូប នៅមណ្ឌល វិទ្យាល័យ ហ៊ុន សែន វត្តស្វាយត្បូង។
សូមបញ្ជាក់ដែរថា ក្នុងឆ្នាំសិក្សា ២០២៥-២០២៦នេះ បេក្ខជនចុះឈ្មោះប្រឡងសរុប ១៥១,២៣៨នាក់ (ស្រី ៨៤,៧៣៥នាក់)។ បេក្ខជនថ្នាក់វិទ្យាសាស្រ្ត មានចំនួន ៣៧,៤៤៥ នាក់ ស្មើនឹង ២៤,៧៦% និងបេក្ខជនថ្នាក់វិទ្យាសាស្រ្តសង្គមមានចំនួន ១១៣,៧៩៣នាក់ ស្មើនឹង ៧៥,២៤%៕
