អ្នកក្រុងបាងកក បង្ហាញការខឹងសម្បារម្ដងហើយម្ដងទៀត ដាក់នាយករដ្ឋមន្ត្រី Anutin ព្រោះទឹកជំនន់ធ្ងន់ធ្ងរ

លោក Anutin Charnvirakul នាយករដ្ឋមន្ត្រីថៃ នៅតែជាផ្ទាំងស៊ីបសម្រាប់កំហឹងរបស់ប្រជាពលរដ្ឋ បន្ទាប់ពីលោកបានជួបប្រទះការរិះគន់ និងប្រតិកម្មមិនពេញចិត្តពីសំណាក់ពួកគេម្ដងហើយម្ដងទៀត នៅពេលលោកចុះចែកអំណោយសង្គ្រោះបន្ទាន់ក្នុងអំឡុងពេលមានទឹកជំនន់ធ្ងន់ធ្ងរ នៅតំបន់លំនៅឋាន Khlong Chan ក្នុងខណ្ឌ Bang Kapi នៃទីក្រុងបាងកក។
តំបន់លំនៅដ្ឋាន Khlong Chan គឺជាកន្លែងរស់នៅរបស់គ្រួសារជាង ៤.០០០ ហើយតំបន់នេះត្រូវបានរងផលប៉ះពាល់យ៉ាងធ្ងន់ធ្ងរដោយសារទឹកជំនន់។ ស្ថានីយទូរទស្សន៍ Thai PBS បានរាយការណ៍ថា កម្រិតទឹកជំនន់នៅតែមានកម្ពស់ប្រហែល ១,៥ ម៉ែត្រនៅថ្ងៃទី ២៨ ខែកញ្ញា ខណៈប្រជាពលរដ្ឋបានស្នើសុំឱ្យមានការបន្ថែមម៉ាស៊ីនបូមទឹក ដើម្បីបូមទឹកចេញពីតំបន់នោះ និងស្តារការផ្គត់ផ្គង់ទឹកស្អាតឡើងវិញ។
លោក Anutin បានចុះទៅពិនិត្យតំបន់នោះជាលើកដំបូងនៅថ្ងៃទី ២៧ ខែកញ្ញា ដើម្បីវាយតម្លៃស្ថានភាពទឹកជំនន់ ផ្តល់ការគាំទ្រដល់ប្រជាពលរដ្ឋ និងចែកសម្ភារៈចាំបាច់សម្រាប់ការរស់នៅ។ លោកបានធ្វើដំណើរតាមទូកក្នុងតំបន់លំនៅឋានដែលលិចលង់ដោយទឹកជំនន់នោះ ជាកន្លែងប្រជាពលរដ្ឋបានប្រមូលផ្តុំគ្នាដើម្បីទទួលយកអាហារ ទឹក និងសម្ភារៈចាំបាច់ផ្សេងៗទៀត។
ប្រជាពលរដ្ឋមួយចំនួនបានស្នើឱ្យមានការដំឡើងម៉ាស៊ីនបូមទឹកបន្ថែមទៀត ដើម្បីកាត់បន្ថយកម្រិតទឹកជំនន់។ អ្នកខ្លះទៀតបានបង្ហាញការខឹងសម្បារចំពោះនាយករដ្ឋមន្ត្រី ដោយមានប្រជាពលរដ្ឋម្នាក់ត្រូវបានគេរាយការណ៍ថាបានស្រែកដាក់ Anutin ថា «អ្នកមានពេកហើយ!» ខណៈម្នាក់ទៀតបានសួរថា «អ្នកមកទីនេះធ្វើអី ?»។ ប្រជាពលរដ្ឋមួយចំនួនក៏បានប្រើពាក្យសម្តីបែបចំអកឌឺដងឱ្យលោក Anutin ដែលកំពុងជិះទូកមើលតំបន់លិចលង់នោះផងដែរ ដោយពួកគេសំដៅទៅលើសេចក្តីថ្លែងការណ៍របស់រដ្ឋាភិបាលកាលពីកន្លងទៅពាក់ព័ន្ធនឹងស្ថានភាពទឹកជំនន់នៅក្នុងទីក្រុងបាងកក។
នាយករដ្ឋមន្ត្រីថៃរូបនេះពុំបានឆ្លើយតបទៅនឹងការរិះគន់ទាំងនោះអំឡុងពេលនោះទេ។ផ្ទុយទៅវិញ សមាជិកក្រុមការងាររបស់លោកបានប្រាប់ប្រជាពលរដ្ឋថានាយករដ្ឋមន្ត្រីបាននាំយកទឹកមកឱ្យពួកគេទេ។
នៅថ្ងៃទី ២៨ ខែកញ្ញាសប្ដាហ៍នេះ Anutin បានត្រឡប់ទៅកាន់តំបន់លំនៅឋាន Khlong Chan ម្តងទៀត តែនៅតែត្រូវបានក្រុមអ្នកស្រុកទាំងនោះជះកំហឹងដាក់ដដែល៕