អាស៊ានជំរុញការចាប់យកបច្ចេកវិទ្យា និងទំនើបកម្មវិស័យកម្មន្តសាល លើនវានុវត្តន៍សម្រាប់តំបន់

វេទិកា ASEAN NEXT ឆ្នាំ២០២៥ បានផ្តោតលើកិច្ចខិតខំរបស់អាស៊ាន ក្នុងការជំរុញវិទ្យាសាស្ត្រ បច្ចេកវិទ្យា និងនវានុវត្តន៍ សម្រាប់ជាកាតាលីករ សម្រាប់កំណើនសេដ្ឋកិច្ច និងទំនើបកម្មវិស័យកម្មន្តសាលនៅទូទាំងតំបន់។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងនៅក្នុងវេទិកា ASEAN NEXT ឆ្នាំ២០២៥ ដែលបានរៀបចំឡើងនៅរាជធានីភ្នំពេញ ថ្ងៃទី៣ ខែធ្នូ ឆ្នាំ២០២៥ នេះថា ភាពប្រកួតប្រជែងនៃវិស័យកម្មន្តសាល ក្នុងសតវត្សរ៍ទី២១ មិនផ្អែកលើកម្លាំងពលកម្មដែលមានតម្លៃទាបនោះទេ ប៉ុន្តែត្រូវផ្អែកលើចំណេះដឹង ប្រព័ន្ធឌីជីថល និងបច្ចេកវិទ្យា ទំនើប ហើយហេដ្ឋារចនាសម្ព័ន្ធទន់ ជាក្របខ័ណ្ឌដ៏មានឥទ្ធិពលនៃបច្ចេកវិទ្យា នវានុវត្តន៍ និងមូលធនមនុស្ស។
ឯកឧត្តមរដ្ឋមន្ត្រី បានរំលេចនូវកិច្ចខិតខំប្រឹងប្រែងរបស់កម្ពុជា ក្នុងការកសាងប្រព័ន្ធអេកូឡូស៊ីឧស្សាហកម្ម រួមទាំងការសិក្សា សមិទ្ធិលទ្ធភាព បង្កើតសួនវិទ្យាសាស្ត្រ បច្ចេកវិទ្យា និងនវានុវត្តន៍ ការរៀបចំបង្កើតមូលនិធិស្រាវជ្រាវ និងអភិវឌ្ឍន៍ជាតិ និងការរៀបចំ សេចក្តីព្រាងច្បាប់ ស្តីពីការផ្ទេរបច្ចេកវិទ្យា ដើម្បីពង្រឹងក្របខ័ណ្ឌនវានុវត្តន៍សម្រាប់កម្ពុជា និងតំបន់ទាំងមូល។
ឯកឧត្តម កៅ គឹមហួន អគ្គលេខាធិការអាស៊ាន បានបញ្ជាក់ការគាំទ្រអាទិភាពនៃវេទិកា ASEAN NEXT ឆ្នាំ២០២៥ ដោយ ភ្ជាប់កម្មវត្ថុនៃវេទិកានេះ ទៅនឹងផែនការសកម្មភាពអាស៊ានស្តីពីវិទ្យាសាស្ត្រ បច្ចេកវិទ្យា និងនវានុវត្តន៍ ឆ្នាំ២០២៦-២០៣៥ ថាជា “ត្រីវិស័យរួមសម្រាប់តំបន់”។ ឯកឧត្តមបានសង្កត់ធ្ងន់ថា ភស្តុភារទំនើប ថាមពល ការតភ្ជាប់ឌីជីថល និងហេដ្ឋារចនាសម្ព័ន្ធឆ្លាតវៃ គឺជាមូលដ្ឋានគ្រឹះសម្រាប់ភាពធន់ នៃខ្សែច្រវាក់ផ្គត់ផ្គង់វិស័យកម្មន្តសាល និងបានជំរុញឱ្យប្រទេសសមាជិកអាស៊ាន ពង្រីកការចាប់ យកបច្ចេកវិទ្យា និងបង្កើនកម្លាំងពលកម្មជំនាញ ខណៈដែលបច្ចុប្បន្នសហគ្រាសធុនតូចក្នុងតំបន់ ប្រមាណតែ ១៦,៨% ប៉ុណ្ណោះ ដែលផ្តល់ការបណ្តុះបណ្តាលជំនាញដល់បុគ្គលិក។
ក្នុងវេទិកានេះ លោកបណ្ឌិត Song Jianyuan នាយករងនៃមជ្ឈមណ្ឌលផ្ទេរបច្ចេកវិទ្យាចិន-អាស៊ាន បានលើកឡើងពីសារៈ សំខាន់នៃការបន្តកិច្ចសហប្រតិបត្តិការបច្ចេកវិទ្យា ការពង្រីកកម្មវិធីទ្វេភាគីរវាងចិន និងបណ្តាប្រទេសអាស៊ានចំនួន៩ និងការពង្រីក បណ្តាញនវានុវត្តន៍ ដែលបច្ចុប្បន្នមានជាង ២.៩០០ ស្ថាប័នចូលរួម។
លោកបណ្ឌិត Jianyuan បានលើកឡើងថា៖ “វេទិកា ASEAN NEXT ផ្តោតលើតម្រូវការជាក់ស្តែងរបស់ប្រទេសអាស៊ាន សម្រាប់ការធ្វើទំនើបកម្មឧស្សាហកម្ម និងបរិវត្តកម្មឌីជីថល។ កិច្ចសហប្រតិបត្តិការវិទ្យាសាស្ត្រទាំងនេះ នឹងជំរុញសាមគ្គីភាព និង កំណើនសេដ្ឋកិច្ចប្រកបដោយគុណភាពសម្រាប់តំបន់។” តំណាងប្រទេសជាសមាជិកអាស៊ាន និងប្រទេសចិន ក៏បានបង្ហាញការប្តេជ្ញា ចិត្ត ក្នុងការអនុវត្តផែនទីបង្ហាញផ្លូវសហប្រតិបត្តិការ ដោយផ្តោតលើការចាប់យកបច្ចេកវិទ្យាទំនើបដូចជា បញ្ញាសិប្បនិម្មិត IoT និងបច្ចេកវិទ្យារ៉ូបូត, ការអភិវឌ្ឍកម្លាំងពលកម្មជំនាញ, សុខដុមនីយកម្មគោលនយោបាយ, និងកិច្ចសហការផ្អែកលើថ្នាលបច្ចេកវិទ្យា តាមរយៈយន្តការដូចជាគណៈកម្មាធិការអាស៊ាន COSTI មជ្ឈមណ្ឌលផ្ទេរបច្ចេកវិទ្យាចិន-អាស៊ាន ច្រករបៀងនវានុវត្តន៍មេគង្គ-ឡាង ឆាង និងក្របខ័ណ្ឌផែនការសកម្មភាពAPASTI ជាដើម៕