អភិបាលខេត្តត្បូងឃ្មុំ ចុះពិនិត្យទីតាំងប្រឈមការបាក់ច្រាំងទន្លេ និងតំបន់រងការលិចលង់ដោយទឹកជំនន់ នៅស្រុកក្រូចឆ្មារ

(ត្បូងឃ្មុំ)៖ នៅថ្ងៃទី៩ ខែសីហា ឆ្នាំ២០២៦នេះ លោក ប៉ែន កុសល្យ អភិបាលខេត្តត្បូងឃ្មុំ បានដឹកនាំថ្នាក់ដឹកនាំខេត្ត និងមន្ទីរ-អង្គភាពពាក់ព័ន្ធ ចុះពិនិត្យដោយផ្ទាល់នូវស្ថានភាពទីតាំងដែលប្រឈមនឹងការបាក់ច្រាំងទន្លេ ស្ថិតក្នុងឃុំប៉ើស១ និងតំបន់ដែលរងការលិចលង់ដោយទឹកជំនន់ ស្ថិតនៅឃុំឈូក ក្នុងភូមិសាស្ត្រស្រុកក្រូចឆ្មារ ខេត្តត្បូងឃ្មុំ។

ក្នុងឱកាសចុះពិនិត្យនេះ លោកអភិបាលខេត្ត បានស្តាប់របាយការណ៍ពីអាជ្ញាធរមូលដ្ឋាន និងមន្ត្រីជំនាញ ពាក់ព័ន្ធនឹងស្ថានភាពច្រាំងទន្លេ កម្រិតទឹក និងផលប៉ះពាល់ដែលអាចកើតមានចំពោះប្រជាពលរដ្ឋ និងហេដ្ឋារចនាសម្ព័ន្ធ។ លោកបានសង្កត់ធ្ងន់ថា ការចុះពិនិត្យដល់មូលដ្ឋាន គឺដើម្បីវាយតម្លៃស្ថានភាពជាក់ស្តែង និងស្វែងរកវិធានការសមស្រប ដើម្បីទប់ស្កាត់ និងកាត់បន្ថយហានិភ័យដែលអាចបង្កឡើងដោយការបាក់ច្រាំងទន្លេ និងទឹកជំនន់ ព្រមទាំងធានាសុវត្ថិភាព និងការរស់នៅរបស់ប្រជាពលរដ្ឋនៅតំបន់រងផលប៉ះពាល់។

លោក ប៉ែន កុសល្យ ក៏បានណែនាំដល់អាជ្ញាធរស្រុក ឃុំ និងមន្ទីរ-អង្គភាពជំនាញពាក់ព័ន្ធ ត្រូវបន្តតាមដានស្ថានភាពទឹក និងច្រាំងទន្លេជាប្រចាំ ព្រមទាំងត្រៀមលក្ខណៈ និងមធ្យោបាយចាំបាច់ ដើម្បីអន្តរាគមន៍ឱ្យបានទាន់ពេលវេលា ប្រសិនបើមានស្ថានភាពប្រឈម។ ជាមួយគ្នានេះ លោកបានជំរុញឱ្យអាជ្ញាធរមូលដ្ឋាន យកចិត្តទុកដាក់ផ្សព្វផ្សាយ និងជូនដំណឹងដល់ប្រជាពលរដ្ឋដែលរស់នៅតំបន់ប្រឈម ឱ្យមានការប្រុងប្រយ័ត្នខ្ពស់ និងចូលរួមសហការជាមួយអាជ្ញាធរ ក្នុងការអនុវត្តវិធានការការពារ និងជម្លៀសប្រជាពលរដ្ឋទៅកាន់ទីតាំងមានសុវត្ថិភាព ក្នុងករណីមានការចាំបាច់។

ការចុះពិនិត្យនេះ ក៏បានណែនាំឱ្យមន្ទីរ-អង្គភាពជំនាញពាក់ព័ន្ធ ចុះពិនិត្យ និងវាយតម្លៃបច្ចេកទេសលើទីតាំងប្រឈមនឹងការបាក់ច្រាំងទន្លេ ដើម្បីរៀបចំផែនការអន្តរាគមន៍ និងដោះស្រាយបញ្ហាឱ្យបានសមស្រប ស្របតាមស្ថានភាពជាក់ស្តែង។ សកម្មភាពនេះបានបង្ហាញពីការយកចិត្តទុកដាក់ខ្ពស់របស់រដ្ឋបាលខេត្តត្បូងឃ្មុំ ក្នុងការការពារសុវត្ថិភាព ជីវភាព និងទ្រព្យសម្បត្តិរបស់ប្រជាពលរដ្ឋពីគ្រោះធម្មជាតិ។