ប្រមុខការទូតចិន ជួបសមភាគីនៅកូរ៉េខាងត្បូង ខណៈលោក Trump ជំរុញស្រោចស្រង់ការទូតជាមួយកូរ៉េខាងជើង

រដ្ឋមន្ត្រីការបរទេសចិន លោក Wang Yi និងរដ្ឋមន្ត្រីការបរទេសកូរ៉េខាងត្បូង លោក Cho Hyun បានជួបពិភាក្សាគ្នានៅទីក្រុងសេអ៊ូល ដោយពិភាក្សាអំពីបញ្ហាទាក់ទងនឹងឧបទ្វីបកូរ៉េ។
កិច្ចប្រជុំនេះបានកើតឡើងបន្ទាប់ពីទីក្រុងសេអ៊ូល និងទីក្រុងវ៉ាស៊ីនតោន បានកាត់បន្ថយសមយុទ្ធយោធារួមគ្នា ដោយប្រធានាធិបតីសហរដ្ឋអាមេរិក លោក Donald Trump បាននិយាយថា លោកចង់បានការរស់ឡើងវិញនូវការទូតជាមួយមេដឹកនាំកូរ៉េខាងជើង លោក Kim Jong Un។
លោក Wang បាននិយាយថា ប្រទេសចិននឹងបន្តដើរតួនាទីយ៉ាងសំខាន់ក្នុងការលើកកម្ពស់សន្តិភាពនៅក្នុងឧបទ្វីបកូរ៉េ។
លោក Cho បាននិយាយថា លោកសង្ឃឹមថា វឌ្ឍនភាពក្នុងការស្តារទំនាក់ទំនងរវាងកូរ៉េខាងត្បូង និងចិន នឹងរួមចំណែកដល់ស្ថិរភាពនៅក្នុងឧបទ្វីបកូរ៉េ និងទូទាំងតំបន់។
លោក Wang បានទៅដល់ទីក្រុងសេអ៊ូលកាលពីថ្ងៃពុធសប្ដាហ៍នេះ ហើយគ្រោងនឹងជួបជាមួយប្រធានាធិបតី លោក Lee Jae Myung នៅថ្ងៃព្រហស្បតិ៍ទី២០ ខែសីហានេះ ៕