លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អញ្ជើញពិនិត្យកម្មវិធីលើកកម្ពស់ជីវភាពគ្រួសារយុទ្ធជន តាមរយៈកសិកម្មទំនើប នៅខេត្តសៀមរាប

(សៀមរាប)៖ នាព្រឹកថ្ងៃទី២៣ ខែសីហា ឆ្នាំ២០២៦ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានអញ្ជើញចុះពិនិត្យវឌ្ឍនភាព និងការចាប់ផ្តើមអនុវត្ត “កម្មវិធីលើកកម្ពស់ជីវភាពគ្រួសារយុទ្ធជន តាមរយៈគំរូផលិតកម្មកសិកម្មទំនើប” ស្ថិតក្នុងស្រុកប្រាសាទបាគង ខេត្តសៀមរាប។

កម្មវិធីនេះ ត្រូវបានរៀបចំឡើងក្នុងគោលបំណងបង្កើនប្រភពចំណូល និងបង្កើតការងារជូនគ្រួសារយុទ្ធជនពលី និងគ្រួសារកងកម្លាំងជួរមុខ តាមរយៈការបណ្តុះបណ្តាលជំនាញកសិកម្មបែបទំនើប រួមមាន៖ ការដាំដុះបន្លែ ការចិញ្ចឹមសត្វ ការរៀបចំសង្វាក់ផលិតកម្ម ការវេចខ្ចប់ និងការស្វែងរកទីផ្សារចែកចាយកសិផល។

សកម្មភាពនេះ បានបង្ហាញពីការយកចិត្តទុកដាក់ខ្ពស់ និងការផ្តល់កម្លាំងចិត្តយ៉ាងកក់ក្តៅបំផុត ចំពោះវីរយុទ្ធជន និងគ្រួសារកងកម្លាំងដែលបានលះបង់ដើម្បីជាតិមាតុភូមិ ក្នុងគោលដៅជួយឱ្យពួកគាត់មានជីវភាពកាន់តែប្រសើរឡើងតាមរយៈវិស័យកសិកម្ម៕