កម្ពុជា និងអង្គការដៃគូ ប្ដេជ្ញារួមគ្នាលុបបំបាត់បញ្ហាអាហារូបត្ថម្ភគ្រប់ទម្រង់នៅកម្ពុជា

ភ្នំពេញ៖ រាជរដ្ឋាភិបាលកម្ពុជា តាមរយៈក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ និងអង្គការ Helen Keller International បានប្ដេជ្ញាបន្តសហការជាមួយគ្នា ក្នុងការលុបបំបាត់ នូវបញ្ហាអាហារូបត្ថម្ភគ្រប់ទម្រង់ នៅក្នុងប្រទេសកម្ពុជា ជាពិសេសបញ្ហាកង្វះអាហារូបត្ថម្ភលើកុមារ ។
ក្នុងជំនួបពិភាក្សាការងារជាមួយលោកបណ្ឌិត Shawn Baker នាយករងប្រតិបត្តិនៃអង្គការ Helen Keller International កាលពីរសៀលថ្ងៃទី៦ ខែមីនា ឆ្នាំ២០២៦ ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្រ្តី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ បានវាយតម្លៃខ្ពស់ចំពោះកិច្ចសហប្រតិបត្តិការយ៉ាងជិតស្និទ្នរវាងក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងអង្គការ Hellen Keller នាពេលកន្លងមក ដែលបានរួមចំណែកដល់ការពង្រឹងប្រព័ន្ធស្បៀង និងធានាបាននូវសន្តិសុខស្បៀង និងអាហារូបត្ថម្ភដ៏ល្អប្រសើរសម្រាប់ស្ត្រី និងកុមារ ។
ជាមួយនេះ ឯកឧត្តម ក៏បានថ្លែងអំណរគុណអង្គការនេះ ចំពោះការគាំទ្រយន្តការអភិបាលកិច្ចវិស័យសន្តិសុខស្បៀង និងអាហារូបត្ថម្ភទាំងនូវថ្នាក់ជាតិ និងថ្នាក់ក្រោមជាតិ (TWG-FSN & PWG-FSN) ការចូលរួមក្នុងដំណើរការតាក់តែង និងអនុវត្តនូវយុទ្ធសាស្រ្តជាតិស្តីពីសន្តិសុខស្បៀង និងអាហារូត្ថម្ភ ផែនទីបង្ហាញផ្លូវសម្រាប់ការអភិវឌ្ឍប្រព័ន្ធស្បៀងប្រកបដោយចីរភាព និងគំនិតផ្តួចផ្តើមនានា។
ឯកឧត្តមបណ្ឌិតសភាចារ្យ ក៏បានកោតសរសើរអង្គការនេះ ដែលបានគាំទ្រ និងជួយសម្របសម្រួលជាមួយភាគីពាក់ព័ន្ធផ្សេងៗ ក្នុងការដាក់សាកល្បង នូវគម្រោងអន្តរវិស័យ “នវានុវត្តន៍ថ្មីសម្រាប់លទ្ធផលកាន់តែប្រសើរ ការធ្វើសមាហរណកម្ម រវាងវិស័យកសិកម្ម សុខាភិបាល និងអប់រំ ដើម្បីផ្លាស់ប្តូរលទ្ធផលអាហារូបត្ថម្ភនៅកម្ពុជា” (INAS) និងការផ្តល់នូវជំនួយមនុស្សធម៌ ដល់គ្រួសារជនភៀសសឹកពីជម្លោះព្រំដែនកម្ពុជា-ថៃ នាពេលថ្មីៗនេះ ។
ក្នុងឱកាសនោះ ឯកឧត្តមបណ្ឌិតសភាចារ្យ អ៊ុក រ៉ាប៊ុន ក៏បានពន្យល់ដោយសង្ខេបនូវគោលនយោបាយ របស់រាជរដ្ឋាភិបាល នីតិកាលទី៧ នៃរដ្ឋសភា ដែលក្នុងនោះការគិតគូរដល់ការអភិវឌ្ឍមូលធនមនុស្ស គឺជាអាទិភាពចម្បងមួយ ក្នុងចំណោមអាទិភាពផ្សេងៗទៀត ។
ក្នុងឱកាសនោះ អនុប្រធានប្រតិបត្តិនៃអង្គការ Hellen Keller International បានថ្លែងអំណរគុណយ៉ាងជ្រាលជ្រៅដល់ឯកឧត្តមបណ្ឌិតសភាចារ្យ ដែលបានអនុញ្ញាតជូនរូបលោក និងសហការីបានចូលជួប និងសម្តែងការគួរសមនាពេលនេះ ។
ជាមួយនេះ លោកអនុប្រធានប្រតិបត្តិ បានសម្តែងនូវការពេញយ៉ាងខ្លាំង ចំពោះកិច្ចសហប្រតិបត្តិការរវាងស្ថាប័នទាំងពីរ នាពេលកន្លងមក ដែលបានផ្តល់កម្មវិបាកជាវិជ្ជមាន និងជាក់ស្តែងដល់ប្រជាជនកម្ពុជា ពិសេសស្រ្តី និងកុមារ ។ លោកក៏បានធ្វើការប្តេជ្ញាចិត្តថា នឹងបន្តខិតខំគាំទ្រក្រុមប្រឹក្សាស្តារ អភិវឌ្ឍន៍វិស័យកសិកម្ម និងជនបទបន្តទៀត សំដៅរួមចំណែកដល់ចក្ខុវិស័យរបស់កម្ពុជា ក្នុងការលុបបំបាត់បញ្ហាអាហារូបត្ថម្ភគ្រប់ទម្រង់នៅកម្ពុជា ៕