អភិបាលខេត្តកំពត អញ្ជើញចែកវិញ្ញាបនបត្រសម្គាល់ម្ចាស់អចលនវត្ថុ ជូនដល់ប្រជាពលរដ្ឋចំនួន ២,៤៨៨ គ្រួសារ ក្នុងស្រុកឈូក

កំពត៖ នៅថ្ងៃទី១៩ ខែឧសភា ឆ្នាំ២០២៦នេះ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីប្រកាសចែកវិញ្ញាបនបត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិដីធ្លី) ជូនដល់បងប្អូនប្រជាពលរដ្ឋ មកពីភូមចំនួន៤ ក្នុងឃុំតាកែន ស្រុកឈូក។
ពិធីនេះត្រូវបានរៀបចំឡើងនៅក្នុងបរិវេណវត្តត្រពាំងបី ស្ថិតក្នុងភូមិភ្នំព្រាល ឃុំតាកែន ស្រុកឈូក ខេត្តកំពត។
តាមរបាយការណ៍របស់ លោក ព្រាប សុផាត ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពត បានឱ្យដឹងថា វិញ្ញាបនបត្រសម្គាល់ម្ចាស់អចលនវត្ថុ ដែលត្រូវចែកជូនប្រជាពលរដ្ឋនៅក្នុងពិធីនេះ គឺផ្តល់ជូនបងប្អូនប្រជាពលរដ្ឋមកពីភូមចំនួន៤ រួមមាន៖ ភូមិចំការមន, ភូមិវាលក្រសាំង, ភូមិជ័យតាស្វាយ និងភូមិដំណាក់ត្រយឹង ដែលមានក្បាលដីសរុបចំនួន ២,៩២៧ ក្បាលដី ស្មើនឹង ២,៤៨៨ គ្រួសារ៕