លោកTrump ៖ អាមេរិក កាត់បន្ថយទំហំសមយុទ្ធយោធាជាមួយកូរ៉េខាងត្បូង ដោយលើកឡើងពីទំនាក់ទំនងល្អជាមួយលោក Kim Jong Un

ប្រធានាធិបតីអាមេរិក លោក Donald Trump បាននិយាយថា លោកមិនសប្បាយចិត្តចំពោះការចូលរួមរបស់សហរដ្ឋអាមេរិកក្នុងសមយុទ្ធយោធារួមគ្នាជាមួយសម្ព័ន្ធមិត្តជិតស្និទ្ធកូរ៉េខាងត្បូង ហើយកំពុងកាត់បន្ថយទំហំសមយុទ្ធក្នុងគោលបំណងរារាំងគូប្រជែងកូរ៉េខាងជើង ដែលចាប់ផ្តើមនៅថ្ងៃចន្ទ១៧ខែសីហានេះ។
ការអត្ថាធិប្បាយរបស់លោក Trump កាលពីថ្ងៃអាទិត្យ មុនសមយុទ្ធ Ulchi Freedom Shield ប្រចាំឆ្នាំនៅកូរ៉េខាងត្បូង បានគូសបញ្ជាក់ពីឆន្ទៈរបស់លោកក្នុងការប្រឈមនឹងសម្ព័ន្ធមិត្តយោធាយូរអង្វែង ខណៈលោកបានរំលឹកឡើងវិញនូវការចរចារបស់លោកជាមួយមេដឹកនាំកូរ៉េខាងជើង លោក Kim Jong Un ក្នុងអាណត្តិដំបូងរបស់លោក ដែលបានបរាជ័យក្នុងគោលដៅដោះស្រាយកម្មវិធីនុយក្លេអ៊ែររបស់ប្រទេសនេះ។
លោក Trump បានសរសេរនៅលើវេទិកា Truth Social របស់លោកថា ដោយផ្អែកលើទំនាក់ទំនងដ៏ល្អរបស់លោកជាមួយលោក Kim Jong Un នៃប្រទេសកូរ៉េខាងជើង រូបលោកមិនសប្បាយចិត្តនឹងការពិតដែលថាសហរដ្ឋអាមេរិកបានយល់ព្រមចូលរួមក្នុងសមយុទ្ធយោធារួមគ្នាជាមួយកូរ៉េខាងត្បូងជាយូរមកហើយនោះទេ។
លោកបានបន្តថា សមយុទ្ធទាំងនេះមិនត្រឹមតែចំណាយច្រើនប៉ុណ្ណោះទេ ដោយការចំណាយភាគច្រើនទាំងនេះត្រូវបានបង់ដោយសហរដ្ឋអាមេរិក ដូចធម្មតា ប៉ុន្តែបញ្ជូនសញ្ញាមួយដែលមិនសមរម្យ និងអរិភាពទាំងស្រុង ទៅកាន់ប្រទេសមួយដែលដរាបណាលោក Donald J Trump ជាប្រធានាធិបតី គឺមិនមានការភ័យខ្លាច និងគោរព។
លោក Trump បានបន្ថែមថា វាយឺតពេលហើយក្នុងការលុបចោលសមយុទ្ធ ដូច្នេះលោកបានបញ្ជាឱ្យរដ្ឋមន្ត្រីក្រសួងការពារជាតិលោក Pete Hegseth កាត់បន្ថយទំហំយ៉ាងច្រើន៕