ចំនួនអ្នកស្លាប់ ក្នុងគ្រោះរញ្ជួយដីកម្រិត ៦,០រ៉ិចទ័រ នៅអាហ្វហ្គានីស្ថាន បានកើនឡើងដល់៥០០នាក់

ប្រព័ន្ធផ្សព្វផ្សាយរដ្ឋអាហ្វហ្គានីស្ថាន (RTA) បាននិយាយថា អ្នកស្លាប់បានកើនឡើងដល់៥០០នាក់ និងជាង១.០០០ នាក់បានរងរបួសនៅក្នុងប្រទេសអាហ្វហ្គានីស្ថាន បន្ទាប់ពីគ្រោះរញ្ជួយដីកម្រិត៦,០ រ៉ិចទ័រ បានវាយប្រហារប្រទេសនេះ នៅថ្ងៃចន្ទនេះ ។
ទីភ្នាក់ងារស្ទង់ភូគព្ភសាស្ត្ររបស់សហរដ្ឋអាមេរិក (USGS) បានរាយការណ៍ថា ការរញ្ជួយដីដ៏ខ្លាំងក្លាកម្រិត ៦,០ រ៉ិចទ័រ បានវាយប្រហារភាគអាគ្នេយ៍របស់ប្រទេសអាហ្វហ្គានីស្ថាននៅថ្ងៃចន្ទនេះ។
ប្រភពជាច្រើនពីរដ្ឋាភិបាលតាលីបង់ បាននិយាយថា លំនៅឋានរាប់សិបខ្នងរងការបំផ្លិចបំផ្លាញ ហើយរដ្ឋាភិបាលនេះ បារម្ភថាចំនួនអ្នកស្លាប់អាចកើនឡើងថែមទៀត។
ការរញ្ជួយដីនេះត្រូវបានមានអារម្មណ៍ពាសពេញប្រទេសប៉ាគីស្ថាន និងភាគខាងជើងប្រទេសឥណ្ឌា រួមទាំងទីក្រុង ញូវ ដែលី ជាទីដែលអ្នកស្រុករាយការណ៍ពីការរង្គើខ្លាំង។ អគារនានាបានញ័រ ដែលជំរុញឱ្យមនុស្សប្រញាប់ប្រញាល់រត់ចេញទៅខាងក្រៅ។
ទីភ្នាក់ងារស្ទង់ភូគព្ភសាស្ត្ររបស់សហរដ្ឋអាមេរិកខាងលើបាននិយាយថា ការរញ្ជួយដីនេះត្រូវបានគេកត់ត្រានៅចម្ងាយ ២៧ គីឡូម៉ែត្រពីខាងកើតទៅដល់ភាគឦសាននៃរដ្ឋធានី Jalalabad របស់ប៉ាគីស្ថាននៅម៉ោង ១២និង៤៧នាទីព្រឹក ថ្ងៃទី ១ ខែកញ្ញានេះ ក្នុងជម្រៅ ៨ គីឡូម៉ែត្រ។ ទោះបីជាយ៉ាងណាក៏ដោយ មជ្ឈមណ្ឌលស្រាវជ្រាវភូមិសាស្ត្រអាល្លឺម៉ង់ (GFZ) បាននិយាយថា ការរញ្ជួយដីនេះ មានជម្រៅ ១០គីឡូម៉ែត្រ ។
ប្រហែល ២០ នាទីក្រោយមក ខេត្តនេះ បានជួបប្រទះនឹងការរញ្ជួយមួយទៀតដែលកើតឡើងក្នុងកម្រិត ៤,៥ រ៉ិចទ័រ នៅជម្រៅ ១០ គីឡូម៉ែត្រ៕