ប្រមុខ NATO ច្រានចោលការអំពាវនាវឱ្យបង្កើតកងទ័ពអឺរ៉ុបដាច់ដោយឡែក

(ព្រុចសែល)៖ កាលពីថ្ងៃចន្ទ ទី២៦ ខែមករា អគ្គលេខាធិការអង្គការ NATO បានច្រានចោលការអំពាវនាវដែលចង់ឱ្យបង្កើតកងទ័ពអឺរ៉ុបដាច់ដោយឡែកមួយ ខណៈការអំពាវនាវបែបនេះ ត្រូវបានជំរុញដោយភាពមិនច្បាស់លាស់ ជុំវិញការប្តេជ្ញារបស់ប្រធានាធិបតីអាមេរិក លោក ដូណាល់ ត្រាំ ចំពោះសន្តិសុខរបស់អឺរ៉ុប ដែលបានប្រឈមនឹងភាពតានតឹងព្រោះតែរឿងកោះ Greenland។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។
ប្រមុខ NATO លោក Mark Rutte បានលើកឡើងថា បំណងបង្កើតកងកម្លាំងអឺរ៉ុបមួយដាច់ដោយឡែកពីបក្សសម្ព័ន្ធយោធា NATO ដែលដឹកនាំដោយសហរដ្ឋអាមេរិក គឺគ្មានថ្ងៃអាចក្លាយជាការពិតឡើយ ហើយម៉្យាងវិញទៀត ប្រធានាធិបតីរុស្ស៉ី លោក វ៉្លាឌីមៀ ពូទីន មុខជានឹងពេញចិត្តចំពោះគំនិតនេះ ដ្បិតវានឹងធ្វើឱ្យកងទ័ពនៅអឺរ៉ុបត្រូវបែងចែកកម្លាំង ហើយនាំឱ្យពួកគេចុះទន់ខ្សោយ។
ថ្លែងទៅកាន់សភាអឺរ៉ុបក្នុងទីក្រុងព្រុចសែល លោក Rutte បាននិយាយថា ក្រុមប្រទេសអឺរ៉ុបគួរបន្តបង្កើនការទទួលខុសត្រូវថែមទៀត សម្រាប់សន្តិសុខរបស់ខ្លួន ដូចដែលលោក ត្រាំ បានទាមទារ ប៉ុន្តែនៅក្នុងក្របខណ្ឌនៃសម្ព័ន្ធភាពអាមេរិក-អឺរ៉ុប។ លោក Rutte បានអះអាងថា លោក ត្រាំ និងសហរដ្ឋអាមេរិក នៅតែមានការប្តេជ្ញាយ៉ាងរឹងមាំចំពោះ NATO ទោះបីមានភាពមិនច្បាស់លាស់ បង្កឡើងដោយការទាមទាររបស់លោកប្រធានាធិបតីអាមេរិក ឱ្យដាណឺម៉ាកដែលជាសមាជិក NATO បោះបង់ការគ្រប់គ្រងកោះ Greenland ក៏ដោយ។
គួរបញ្ជាក់ថា គំនិតនៃការបង្កើតកងទ័ពអឺរ៉ុប ត្រូវបានលើកឡើងកាលពីពេលថ្មីៗនេះ ដោយរដ្ឋមន្រ្តីការបរទេសអេស៉្បាញ លោក Jose Manuel Albares និងស្នងការទទួលបន្ទុកការពារជាតិ របស់សហភាពអឺរ៉ុប លោក Andrius Kubilius៕