អ៊ុយក្រែន និងរុស្ស៊ី ប្រកាសបទឈប់បាញ់ដាច់ដោយឡែកពីគ្នាចន្លោះថ្ងៃទី៨ និងទី៩ ខែឧសភា

កាលពីថ្ងៃចន្ទ ទី៤ ខែឧសភា រុស្ស៊ីបានប្រកាសបទឈប់បាញ់ជាឯកតោភាគីជាមួយអ៊ុយក្រែនចន្លោះថ្ងៃទី៨ និងទី៩ ខែឧសភា នៅពេលដែលទីក្រុងមូស្គូប្រារព្ធទិវាជ័យជំនះសង្គ្រាមលោកលើកទី២ ប្រចាំឆ្នាំរបស់ខ្លួន និងបានគំរាមថានឹង «វាយប្រហារដោយមីស៊ីលទ្រង់ទ្រាយធំ» ទៅលើទីក្រុងគីវ ប្រសិនបើអ៊ុយក្រែនរំលោភលើបទឈប់បាញ់នេះ។
អ៊ុយក្រែនបានឆ្លើយតបវិញដោយប្រកាសបទឈប់បាញ់ផ្ទាល់ខ្លួនចន្លោះថ្ងៃទី៥និងទី៦ ខែឧសភា ដោយនិយាយថាវា «មិនធ្ងន់ធ្ងរទេ» ក្នុងការរំពឹងថាខ្លួននឹងគោរពបទឈប់បាញ់ក្នុងអំឡុងថ្ងៃឈប់សម្រាកយោធារបស់រុស្ស៊ី។ ជម្លោះរវាងភាគីទាំងពីរកើតឡើងដោយមានភាពស្ងប់ស្ងាត់នៃកិច្ចខិតខំប្រឹងប្រែងផ្នែកការទូតដែលដឹកនាំដោយសហរដ្ឋអាមេរិកដើម្បីបញ្ចប់សង្គ្រាម ខណៈទីក្រុងវ៉ាស៊ីនតោន បានផ្លាស់ប្តូរការផ្តោតការយកចិត្តទុកដាក់របស់ខ្លួនទៅលើតែជម្លោះនៅតំបន់មជ្ឈិមបូព៌ា។
ការវាយប្រហាររបស់រុស្ស៊ីបានសម្លាប់មនុស្ស៩នាក់នៅទូទាំងអ៊ុយក្រែនកាលពីថ្ងៃចន្ទ នេះបើយោងតាមមន្ត្រីអ៊ុយក្រែន ខណៈយានដ្រូនរបស់អ៊ុយក្រែនបានធ្លាក់ទៅលើអគារខ្ពស់មួយកន្លែងក្នុងទីក្រុងមូស្គូ។
ក្រសួងការពារជាតិរុស្ស៊ីបាននិយាយនៅក្នុងសារមួយនៅលើសេវាផ្ញើសារ MAX ដែលគាំទ្រដោយរដ្ឋថា«ស្របតាមការសម្រេចចិត្តរបស់មេបញ្ជាការជាន់ខ្ពស់នៃកងកម្លាំងប្រដាប់អាវុធរុស្ស៊ី លោក Vladimir Putin បទឈប់បាញ់មួយត្រូវបានប្រកាសចាប់ពីថ្ងៃទី ៨ ដល់ថ្ងៃទី ៩ ខែឧសភា ឆ្នាំ ២០២៦ ដោយយើងសង្ឃឹមថាភាគីអ៊ុយក្រែននឹងអនុវត្តតាម» ។
ក្រសួងបាននិយាយបន្ថែមថា «ប្រសិនបើរបបទីក្រុងគីវព្យាយាមអនុវត្តផែនការឧក្រិដ្ឋកម្មរបស់ខ្លួនដើម្បីរំខានដល់ការប្រារព្ធខួបលើកទី ៨១ នៃជ័យជំនះក្នុងសង្គ្រាមស្នេហាជាតិដ៏អស្ចារ្យ កងកម្លាំងប្រដាប់អាវុធរុស្ស៊ីនឹងបើកការវាយប្រហារដោយមីស៊ីលសងសឹកទ្រង់ទ្រាយធំទៅលើកណ្តាលទីក្រុងគីវ» ។