ប្រមុខហិរញ្ញវត្ថុ G7 ស្វែងរកដំណោះស្រាយទប់ស្កាត់អតុល្យភាព ខណៈពាណិជ្ជកម្មធ្វើឱ្យខូចសាមគ្គីភាព
បណ្ដារដ្ឋមន្ត្រីហិរញ្ញវត្ថុនៃក្រុមប្រទេស G7 ដែលកំពុងជួបជុំគ្នានៅទីក្រុងប៉ារីសនៅថ្ងៃចន្ទ១៨ឧសភា នេះ នឹងព្យាយាមស្វែងរកចំណុចរួមលើការដោះស្រាយភាពតានតឹងសេដ្ឋកិច្ចពិភពលោក និងសម្របសម្រួលការផ្គត់ផ្គង់វត្ថុធាតុដើមសំខាន់ៗ ខណៈការខ្វែងគំនិតខាងភូមិសាស្ត្រនយោបាយគំរាមកំហែងដល់ការសាកល្បងសាមគ្គីភាពរបស់ក្រុមនេះ ។
កិច្ចប្រជុំរយៈពេលពីរថ្ងៃនេះ កើតរមានឡើងក្រោយកិច្ចប្រជុំកំពូលរវាងលោកប្រធានាធិបតីអាមេរិក Donald Trump និងលោកប្រធានាធិបតីចិន Xi Jinping នៅទីក្រុងប៉េកាំង ដែលសម្រេចបាននូវសមិទ្ធផលសេដ្ឋកិច្ចជាក់ស្តែងមួយចំនួន ខណៈភាពតានតឹងលើបញ្ហាកោះតៃវ៉ាន់ និងពាណិជ្ជកម្មបានស្ងប់ស្ងាត់ក្រោមការបង្ហាញពីភាពស្និទ្ធស្នាលផ្នែកការទូត។
ក្នុងរបៀបវារៈស្នូលនៅទីក្រុងប៉ារីស ប្រទេសបារាំង គឺជាអ្វីដែលរដ្ឋមន្ត្រីហិរញ្ញវត្ថុបារាំង លោក Roland Lescure បានពិពណ៌នាថាជាភាពមិនស្មើគ្នាឬអតុល្យភាពនៃសេដ្ឋកិច្ចពិភពលោកដ៏ជ្រៅ ដែលកំពុងជំរុញឲ្យមានការកកិតគ្នាផ្នែកពាណិជ្ជកម្ម និងប្រឈមនឹងការដួលរលំដ៏ចលាចលនៅក្នុងទីផ្សារហិរញ្ញវត្ថុ។
លោកថា របៀបដែលសេដ្ឋកិច្ចពិភពលោកបានអភិវឌ្ឍអស់រយៈពេល១០ ឆ្នាំកន្លងមកនេះ គឺមិនអាចទ្រទ្រង់បានឡើយ ដោយចង្អុលទៅគំរូមួយដែលប្រទេសចិនប្រើប្រាស់មិនគ្រប់គ្រាន់ សហរដ្ឋអាមេរិកប្រើប្រាស់ច្រើនពេក និងអឺរ៉ុបវិនិយោគមិនគ្រប់គ្រាន់។
ក្រុមរដ្ឋមន្ត្រីក្រសួងសេដ្ឋកិច្ចរបស់ប្លុកនេះ នឹងស្វែងរកព័ត៌មានថ្មីៗអំពីទំនាក់ទំនងអាមេរិក-ចិន បន្ទាប់ពីកិច្ចប្រជុំកំពូលលោក Trump និង លោក Xi និងកិច្ចខិតខំប្រឹងប្រែងចុងក្រោយរបស់សហរដ្ឋអាមេរិកក្នុងការបើកច្រកសមុទ្រ Hormuz ឡើងវិញ ខណៈរដ្ឋបាលលោក Trump បានអនុញ្ញាតឲ្យមានការលើកលែងទណ្ឌកម្មលើប្រេងតាមសមុទ្ររបស់រុស្ស៊ីដែលនឹងផុតកំណត់នៅថ្ងៃសៅរ៍សប្ដាហ៍នេះ៕
