រថយន្តដឹកសិស្សសាលាប៊ែលធី បុកពីក្រោយម៉ូតូ រុញទៅបុកកង់បី បណ្តាលឱ្យម្ចាស់ម៉ូតូស្លាប់

ភ្នំពេញ៖ បុរសម្នាក់បានស្លាប់ភ្លាមៗ បន្ទាប់ពីជិះម៉ូតូត្រូវបានរថយន្តដឹកសិស្សសាលាប៊ែលធីអន្តរជាតិ បុកពីក្រោយ រួចរុញទៅបុកជាមួយកង់បីឥណ្ឌាមួយគ្រឿងទៀត។ ហេតុការណ៍នេះបានកើតឡើងនៅថ្ងៃទី២២ ខែកញ្ញា ឆ្នាំ២០២៦ នៅលើផ្លូវជាតិលេខ១ ក្នុងសង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។
តាមព័ត៌មានពីកន្លែងកើតហេតុបានឱ្យដឹងថា នៅវេលាម៉ោងប្រមាណ ៦៖៣០នាទីព្រឹក បុរសរងគ្រោះបានជិះម៉ូតូម៉ាក Suzuki Smash ពណ៌ប្រផេះ ពាក់ស្លាកលេខ 1HZ-8405 ធ្វើដំណើរតាមផ្លូវជាតិលេខ១ ក្នុងទិសដៅពីលិចទៅកើត។ នៅពេលធ្វើដំណើរមកដល់ចំណុចក្បែរវត្តចំប៉ា ស្របពេលជាមួយកង់បីឥណ្ឌាពណ៌ស ពាក់ស្លាកលេខ ភ្នំពេញ 1HF-2491 ស្រាប់តែមានរថយន្តម៉ាក សាំយ៉ុង ជារថយន្តដឹកសិស្សសាលាប៊ែលធីអន្តរជាតិ សាខាផ្លូវជាតិលេខ១ ពណ៌ស ពាក់ស្លាកលេខ ភ្នំពេញ 2S-0224 បើកមកពីក្រោយ។
តាមការបញ្ជាក់នៅកន្លែងកើតហេតុ រថយន្តបានបើកក្នុងល្បឿនលឿន ហើយបានជ្រុលទៅបុកពីក្រោយម៉ូតូ បណ្តាលឱ្យម៉ូតូរុញទៅបុកផ្ទប់នឹងកង់បីឥណ្ឌា។ ក្នុងហេតុការណ៍នេះ បុរសជាម្ចាស់ម៉ូតូបានដួល និងរងរបួសធ្ងន់ រហូតបណ្តាលឱ្យបាក់ក និងស្លាប់នៅកន្លែងកើតហេតុ។ ចំណែកអ្នកបើកកង់បីបានរងរបួសស្រាល និងត្រូវបានសមត្ថកិច្ចឃាត់ខ្លួន ដើម្បីសាកសួរ និងចាត់ការតាមនីតិវិធី។ រីឯអ្នកបើករថយន្តដឹកសិស្ស បន្ទាប់ពីកើតហេតុ បានចាកចេញពីកន្លែងកើតហេតុ ហើយត្រូវបានរាយការណ៍ថា បានរត់គេចខ្លួន។
ក្រោយកើតហេតុ សមត្ថកិច្ចជំនាញបានចុះទៅធ្វើការវាស់វែង និងប្រមូលវត្ថុតាង ដោយយកម៉ូតូរបស់ជនរងគ្រោះ កង់បី និងរថយន្តទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំការដោះស្រាយតាមនីតិវិធី។ ដោយឡែក សពជនរងគ្រោះ ត្រូវបានសមត្ថកិច្ចធ្វើកំណត់ហេតុប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី៕