យុវជន៥នាក់ សមត្ថកិច្ចឃាត់ខ្លួន ក្រោយផឹកស៊ីទាស់សម្តីគ្នារហូតវាយតប់ ខណៈម្នាក់គប់ពូថៅសំដៅសមត្ថកិច្ច

(ភ្នំពេញ)៖ ហេតុការណ៍នេះបានកើតឡើងនៅ ថ្ងៃទី០៤ ខែមិថុនា ឆ្នាំ២០២៦ ស្ថិតតាមបណ្ដោយផ្លូវវេងស្រេង ក្នុងសង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។

យុវជនចំនួន៥នាក់ ត្រូវបានកម្លាំងសមត្ថកិច្ចប៉ុស្តិ៍នគរបាលរដ្ឋបាលចោមចៅទី២ ធ្វើការឃាត់ខ្លួន និងបញ្ជូនទៅសាកសួរ បន្ទាប់ពីក្រុមយុវជនទាំងនេះផឹកស៊ីស្រវឹង រួចកើតមានជម្លោះពាក្យសម្តី ឈានដល់ការវាយតប់គ្នាទៅវិញទៅមក បង្កភាពចលាចល និងការភ្ញាក់ផ្អើលនៅមុខក្លិបកម្សាន្ត X ZOOM។

តាមប្រភពព័ត៌មានពីកន្លែងកើតហេតុបានឱ្យដឹងថា ក្រុមយុវជននេះ បាននាំគ្នាផឹកស៊ីកម្សាន្ត ប៉ុន្តែក្រោយមកក៏កើតមានការឈ្លោះប្រកែកគ្នាយ៉ាងតឹងសរសៃក រហូតផ្ទុះជាអំពើហិង្សាវាយតប់គ្នាទៅវិញទៅមកនៅទីសាធារណៈ។ សមត្ថកិច្ចបានចុះទៅអន្តរាគមន៍ដើម្បីបញ្ឈប់សកម្មភាព និងរក្សាសណ្ដាប់ធ្នាប់សាធារណៈ។ អ្វីដែលគួរឱ្យភ្ញាក់ផ្អើលនោះ គឺក្នុងអំឡុងពេលសមត្ថកិច្ចកំពុងអន្តរាគមន៍ ស្រាប់តែយុវជនម្នាក់ក្នុងចំណោមនោះ បានយកពូថៅគប់សំដៅទៅលើសមត្ថកិច្ច បង្កឱ្យមានការភ្ញាក់ផ្អើល និងការព្រួយបារម្ភយ៉ាងខ្លាំងពីប្រជាពលរដ្ឋ និងអ្នកធ្វើដំណើរនៅក្បែរកន្លែងកើតហេតុ។

សមត្ថកិច្ចឃាត់ខ្លួនយុវជនទាំង៥នាក់ បញ្ជូនទៅកាន់ប៉ុស្តិ៍នគរបាលរដ្ឋបាលចោមចៅទី២ ដើម្បីសាកសួរ ប្រមូលភស្តុតាង និងចាត់ការបន្តតាមនីតិវិធីច្បាប់។

ប្រភពព័ត៌មានបានបញ្ជាក់ថា យុវជន៥នាក់ផឹកស៊ីវាយតប់គ្នាមុខក្លិប X ZOOM ម្នាក់គប់ពូថៅសំដៅសមត្ថកិច្ច ។ សមត្ថកិច្ចចុះអន្តរាគមន៍ជម្លោះមុខក្លិប X ZOOM ស្រាប់តែយុវជនម្នាក់គប់ពូថៅ បញ្ចប់ដោយការឃាត់ខ្លួន៥នាក់ស្រវឹងបាត់ម្ចាស់ការ! ផឹកស៊ីទាស់សម្តីគ្នារហូតវាយតប់ ម្នាក់ហ៊ានគប់ពូថៅដាក់សមត្ថកិច្ចនៅចោមចៅ ៕